O mércores 2 de febreiro convocamos ás familias das aulas que van cultivar para que axudasen a preparar o horto do invernadeiro.
É un horto con moito gramón e no que se atopa moita pedra. Antigamente ese espazo era un patio de recreo e posteriormente reformouse e converteuse nun xardín. Dende o 2017 cultivamos nel e temos o invernadeiro.
Xuntamos neste cometido de preparar o horto un grupo xeitoso de nais/pais, que xunto con algúns raparigos/raparigas foi unha actividade que se desenvolveu moi ben.
Co asesoramento de Guillermo Rodríguez determinouse deixar o invernadeiro para as actividades de sementeira en caixóns. Guillermo prevía que para sementar o invernadeiro non é suficiente e decideuse facer dous bancais de 4 x 0'80m destinados á sementeira tamén. Arrincáronse uns amorodos plantados hai xa dous anos e nese espazo preparáronse dous bancais libres das tubaxes soterradas de rego. Tamén se preparou o bancal de 3x1m instalado o curso pasado para cultivar nel.
Non foi fácil: había moitísimo gramón, infinidade de pedras, cachos de terrazo e terra dura que nunca antes se afondou 60 cm. Ninguén se rindeu e todos tivemos oportunidade e vontade de realizar distintas tarefas coas ferramentas.
Mil grazas ás familias que participaron !
Guillermo tomou mostras da terra para analizar e informará do estado do terreo de forma detallada.
O mércores 9 de febreiro os nenos e nenas de 5 anos retiraron algunhas pedriñas obtidas cando se preparou o horto.
No hay comentarios:
Publicar un comentario